MALAIGWANANI MONDULI WAHAMASISHWA KUSHIRIKI UCHAGUZI NOVEMBA 27, 2024

Posted on: November 1st, 2024

Kwa niaba  ya  Msimamizi wa Uchaguzi  Wilaya ya  Monduli Ndg. Sembere  Siroma ambaye pia ni Mratibu wa Uchaguzi Wilayani humo Novemba1, 2024 amezungumza na  wazee   wa Mila (Laigwanani) katika ukumbi  wa Snake park  uliopo Meserani kwa  Lengo la kutoa  hamasa ya Uchaguzi wa Serikali za Mitaa kwa  malaigwani  hao utakaofanyika Novemba 27, 2024.

Akizungumzia Uchaguzi huo Ndg. Sembele Siroma   amesema " Novemba 27, 2024  ni siku  muhimu katika  Taifa  letu ambapo  Wananchi  wote waliojiandikisha katika daftari la wakazi  wanatakiwa kutumia  siku hiyo  kupiga  kura   ikiwa ni  haki  yao kisheria  na kikatiba   kuchagua  viongozi wanaofaa watakao wasikiliza  na kutatua  changamoto zao ikiwemo  kuwezesha kusimamia shughuli za maendeleo  katika maeneo  yao. Hivyo  ninyi Kama Malaigwanani mnalo jukumu la kuwahamasisha  Wananchi  kujitokeza  kwa wingi kama walivyojiandisha kwenda kupiga kura ili  zoezi Hilo la Uchaguzi  liweze  kufanikiwa." Amesema Ndg. Sembere

Naye Annael Mbise kwa niaba ya  Mkuu  Wilaya ya Monduli amewaeleza Malaigwanani  hao kuwa kufuatilia Tangazo la TAMISEMI,  Novemba 27, 2024 ni siku ya mapumziko ambapo  kila Mwananchi ana nafasi  ya  kushiriki zoezi la   Uchaguzi  katika eneo alilojiandikishia hivyo kwa  kuwa  Uchaguzi  wa Serikali za Mitaa  ndiyo dira ya maendeleo  katika nchi yetu tujitahidi   tuchague viongozi wenye maono  watakao wasemea katika  ngazi za juu na kuwezesha kuleta maendeleo katika  vijiji  na vitongoji  vyetu.

"Kiongozi unae  mchagua ndiye atakaye leta maendeleo, kwani  kiongozi unaemchagua wewe ndiye anayekusikiliza  na kutatua changamoto za  eneo  lako." amesema Mbise

Kwa upande wake Bi.Christina Christopher  Mratibu  wa Uchaguzi ngazi ya  Wilaya ameeleza kuwa kwa kipindi hiki cha  Uchaguzi tunawategemea  sana Malaigwanani  wetu katika maeneo  mnayoishi  kuhakikisha kuwa kila  aliyejiandikisha kwenye daftari la wakazi katika kila kaya anajitokeza kwenda kupiga kura.

Aidha  ameongeza kuwa, kwa wale vijana  waliojiandikisha  kabla  hawajatoka kupeleka mifugo  machungani wakapige kura kwanza  kisha waendelee na  majukumu yao ya kila siku. Hii ni sambamba na maeneo ambayo siku hiyo ni  siku ya mnada viongozi (Malaigwanani) muwasisitize wananchi waanzie vituoni kupiga  kura  kisha wapeleke bidhaa zao Sokoni.

Vilevile, Ndg. Emmanuel Nyanda ambaye ni Afisa utamaduni  Wilaya  ya Monduli ametoa hamasa kwa  malaigwani hao kutowaacha nyuma wanawake, vijana wa  kike na wakiume  waliojiandikisha  katika  daftari la wakazi  kushiriki zoezi la kupiga kura.

Akizungumza kwa niaba ya Malaigwanani, Mzee Silonga Ngine ( Makamu Mwenyekiti wa Laigwanani Monduli) ametoa shukrani kwa Serikali kutambua uwepo wa uongozi wa wazee wa kimasai Monduli, na kuahidi kwa umoja wao kushiriki kikamilifu katika zoezi la Uchaguzi.

Akihitimisha hamasa hiyo kwa Malaigwanani, Ndg. Sembere Siroma amewasisitiza kuendelea kuhamasisha wananchi wote waliojiandikisha katika vijiji, vitongoji na kata zao kushiriki uchaguzi kwa kuchagua viongozi wenye maono ya kusimamia vema maendeleo kwa kipindi cha miaka mitano ijayo.