MAAFISA RASILIMALI WATU WATAKIWA KUWAWEZESHA WATUMISHI KUWA WABUNIFU

Posted on: November 4th, 2024

Maafisa Rasilimali watu afrika wamekumbushwa  kuwa, uongozi wa rasilimali watu katika sekta ya Umma ni zaidi ya kuajiri na kusimamia watumishi ni  kwenda mbali zaidi kwa kianda mazingira wezeshi kwa  wafanyakazi ikiwa ni pamoja na kukuza uwezo wao, kuvumbua, na kuleta mabadiliko chanya katika utendaki kazi.

Rai hiyo imetolewa na Mkuu wa Wilaya ya Monduli  Mhe.Festo Shemu Kiswaga, wakati akitoa salamu za Mkoa wa Arusha kwa niaba ya Mkuu wa Mkoa huo, Mhe.Paul Christian Makonda  kwenye Mkutano wa 9 wa Mtandao wa Mameneja na Wasimamizi wa Rasilimali Watu katika sekta za Umma Barani Afrika 2024,  unaofanyika mkoani Arusha kwenye Kituo cha Mikutano ya Kimataifa Arusha (AICC) mapema leo Novemba 04, 2024.

Amesema kuwa, viongozi wetu wa rasilimali watu wanapaswa kuwa na mbinu za kisasa zinazojumuisha maarifa, uadilifu, na ufanisi katika kujenga watumishi wanaoweza kustahimili na kubadilika na changamoto zinazokwenda sambamba na mabadiliko ya teknolojia na mahitaji ya kiuchumi kwenye nchi za Afrika.

Aidha, amewakaribisha washiriki na wageni wote,  Arusha kwa kuwahakikishia usalama  wao na kuwa mkoa unajivunia kuwa wenyeji wa mkutano huo muhimu wenye lengo la kuimarisha uongozi na utawala bora, pamoja na uvumbuzi katika sekta ya Umma.

Kauli mbiu ya mkutano huo ni "Utawala Stahimilivu na Ubunifu; Kutunza Sekta ya Umma Ijayo Kupitia Uongozi wa Rasilimali Watu.