WATUMISHI WA UMMA WILAYA YA MONDULI WATAKIWA KUJIANDIKISHA NA KUPIGA KURA

Posted on: October 9th, 2024

Afisa Uchaguzi wa Wilaya ya Monduli Ndg.Petro Mwashiuya Leo Oktoba 9, 2024 katika Ukumbi wa Halmashauri hiyo, amewataka watumishi wote wa Halmashauri ya Wilaya ya Monduli kujiandikisha kwenye daftari la orodha ya wakazi katika maeneo wanayoishi ifikapo Oktoba 11 hadi 20 ili waweze kupata fursa ya kupiga kura Novemba 27, 2024 kuwachagua viongozi watakao waongoza katika kipindi cha miaka mitano ijayo.

Ndg. Petro Mwashiuya ameyasema hayo leo ikiwa imebaki siku moja kuanza rasmi zoezi la uandikishaji wa daftari la orodha ya wakazi kuelekea uchaguzi wa Serikali za Mitaa novemba 27, 2024. Ambapo ameeleza rasmi kuwa kutafanyika uzinduzi wa tukio hilo na Mhe. DC Festo Kiswaga atazindua rasmi zoezi hilo katika viwanja vya Soko la kila siku la Monduli Mjini.

Ndg. Petro Mshiuya amesisitiza Watumishi wote kushiriki uzinduzi huo na kuonesha uzalendo wao katika tukio hilo muhimu linalopelekea kupata haki yao ki-katiba ya kupiga kura.

"Serikali za Mitaa,Sauti ya Wananchi, Jitokeze kushiriki Uchaguzi"