WANAMICHEZO MONDULI WANAOSHIRIKI MICHEZO YA SHIMISEMITA WAAGWA RASMI

Posted on: August 15th, 2025

Mkurugenzi Mtendaji wa Halmashauri ya Wilaya ya Monduli Bi. Happiness R. Laizer, leo Agosti Agost 15,  2025, amewaaga rasmi na kuwatakia kila la heri Watumishi  wanamichezo wa Halmashauri hiyo wanaoelekea jijini Tanga kushiriki Mashindano ya Michezo ya  Watumishi wa Serikali za Mitaa (SHIMISEMITA) mwaka 2025.

Mashindano hayo, hufanyika kila mwaka yakihusisha Halmashauri 184 za Mikoa ya Tanzania yameanza  rasmi Agosti 15 hadi 29, 2025.

Bi. Laizer amewapongeza wachezaji kwa kuchaguliwa kuiwakilisha Monduli na kuonesha matumaini makubwa ya ushindi kutokana na ongezeko la idadi ya wachezaji mwaka huu. “Mwaka jana tulishiriki kwa idadi ndogo, lakini mwaka huu tuna timu kubwa na naamini tutarudi na ushindi,” amesema Bi. Happiness Lazer.

Kwa upande wake, Ndg. Haruna H. Haji (wa pili kulia) Mkuu wa Divisheni ya Biashara, Viwanda na Uwekezaji ambaye ni  kaimu Mwenyekiti wa Timu ya Wanamichezo, amemshukuru Mkurugenzi kwa kutoa vifaa vyenye thamani vya michezo na kuongeza idadi ya wachezaji huku akiahidi kuwa timu zote zitajituma ili Monduli irejee na ushindi mkubwa.

Bi. Happiness R. Laizer amehitimisha Kwa kumshukuru mdau kutoka Chama cha Walimu Monduli kwa mchango wa majitoleo ya maji kwa wanamichezo na kuwaombea afya njema, huku  akiwahimiza kuwa na ujasiri na kujiamini ili kufanya vizuri katika mashindano hayo.