MONDULI YANG'ARA MATOKEO YA MITIHANI YA TAIFA 2024 MA 2025

Posted on: July 8th, 2025

Halmashauri ya Wilaya ya Monduli iliyopo Mkoani Arusha imeendelea kung'ara katika matokeo ya mitihani ya Kitaifa kwa shule za Sekondari kwa mwaka 2024, kidato cha pili, kidato cha nne, na kidato cha sita 2025 kwa ufaulu wa asilimia 100.

Akizungumzia ufaulu huo Bi. Happiness R. Laizer Mkurugenzi Mtendaji wa Halmashauri hiyo amesema kuwa katika matokeo ya kidato cha pili, shule zote za Sekondari ndani ya Halmashauri hiyo zimepelekea  Halmashauri kupata ushindi wa nafasi ya kwanza kati ya Halmashauri 184 na kutunukiwa TUZO na CHETI.

Aidha, ameeleza kuwa kwa matokeo ya kidato cha nne Halmashauri hiyo pia imejitwalia nafasi ya Tano (5) kati ya Halmashauri 184 zilizofanya mitihani hiyo  na hivyo kutunukiwa TUZO na CHETI.

Bi. Happiness R. Laizer ameendelea kusema kuwa katika mitihani ya kidato cha sita iliyofanyika May, 2025 Halmashauri ya Wilaya ya Monduli imeendelea pia kufanya vizuri kwa kupata ufaulu wa asilimia 100 kwa shule zote sita zilizopo Wilayani humo.

Naye Mwl. Given Moye Kaimu Afisa Elimu Sekondari ameeleza mikakati sita inayopelekea Halmashauri hiyo kuendelea kupanda katika Sekta ya Elimu kuwa ni pamoja na Ofisi yake kufanya ziara za mara kwa mara katika Shule zote kufuatilia suala la ufundishaji, kuungana na Wakuu wa shule zote na kufanya ziara mashuleni ili kubaini changamoto zilizopo na kuzitatua pamoja na kubadilishana uzoefu, kusimamia utendaji kazi na kufanya masahinisho ya mitihani na mazoezi kwa Wanafunzi,  Wanafunzi kushiriki Michezo pamoja na kuwepo kwa chakula bora na  cha kutosha kwa Wanafunzi wawapo shuleni.

Bi. Happiness  amewapongeza walimu wote wa shule za Sekondari Wilayani humo kwa kazi nzuri iliyopelekea kupata ufaulu huu endelevu, Wanafunzi kwa usikivu na kujiandaa vyema katika mitihani yao, na Maafisa Elimu wote tangu ngazi ya Kata kwa usimamizi mzuri.

Ambapo zaidi, Bi. Happiness ameishukuru Serikali ya awamu ya sita kwa kuendelea kutoa fedha za ruzuku ya chakula kwa shule zote Wilayani Monduli.