MKUU WA WILAYA YA MONDULI ATOA TAMKO NA MAELEKEZO MGOGORO WA ARDHI MOITA.

Posted on: January 29th, 2025

Mkuu wa Wilaya ya Monduli Mhe. Festo S. Kiswaga ametoa tamko na  maelekezo juu ya utatuzi wa malalamiko ya uvamizi  wa eneo la malisho na uuzwaji wa viwanja Kata ya Moita iliyopo Wilayani Monduli.

Tamko na maelekezo hayo yametolewa Jan 29, 2025 na Mhe. Kiswaga katika eneo la viwanja vya mpira vya Moita Bwawani ambapo katika hatua za utatuzi wa mgogoro huo ameagiza kufutwa kwa taratibu zote  zilizofanyika juu ya ardhi hiyo na kuagiza Sheria, kanuni na taratibu zifuatwe  na mchakato uanze upya .

Sanjari na hilo Mhe.Festo Kiswaga amemuagiza Mkurugenzi Mtendaji wa Halmashauri ya Wilaya ya Monduli kutuma timu ya  wataalamu kwa ajili ya mapito ya mchakato wa ujenzi wa ofisi ya Kijiji na uuzaji wa viwanja katika Kata hiyo.

Mhe. Kiswaga amehitimisha kwa kuhimiza Wananchi wa Moita  kuendelea na ushirikiano katika eneo la malisho kwa ajili ya kulishia mifugo kama zamani na kwamba waendelee kulinda na kutunza amani na upendo vilivyokuwepo na kazi iendelee.